У21: Целта е јасна, фудбалските надежи сакаат победа над Фарски Острови
Младата У21 репрезентација на Македонија вчера го имаше последниот официјален тренинг пред денешниот натпревар од квалификациите за пласман на Европско 2023 против незгодната селекција на Фарски Острови.
Противникот во досегашниот тек од квалификациите освои четири бода, посебно изненадувачки е одиграното реми на домашен терен против апсолутниот фаворит во групата, селекцијата на Франција.
Играчот за врска Али Адем со нетрпение го очекува мечот, целта е јасна на сите фудбалери, а тоа е забележување на првата победа во овие квалификации.
– Максимално сме фокусирани на натпреварот со Фарски Острови, со нетрпение го очекуваме дуелот. Имаме доволно време да се прилагодиме на временските прилики тука, и да се подготвиме што подобро за мечот. Одиме чекор по чекор, верувам во моите соиграчи, имаме квалитет и доколку одиграме како што од нас очекува селекторот, ќе ја оствариме целта, а тоа е да се вратиме дома со три бода.
Нема да биде лесно, во денешниот фудбал нема слаба репрезентација, истото важи и за нашата група. Фарски Острови е незгодна селекција, поготово кога игра на домашен терен. Играме на мал стадион, со вештачка трева, нема да биде лесно, но ќе дадеме се од себе за да ги освоиме трите бода – вели Адем.
Натпреварот ќе се игра од 15.00 часот во Класвик во рамките од групата „Х“ каде што моментно на табелата сме последнопласирани на шестата позиција со еден бод, колку што има и Србија на петтото место, лидер е Украина со шест, пред Франција и Фарски Острови по четири, а три има Ерменија.