На денешната прес-конференција на премиерот Зоран Заев и претседателот на Европскиот совет, Доналд Туск во Владата, премиерот истакна благодарност кон Туск за неговите залагања Македонија да ги започне преговорите да стане членка на Европската Унија во октомври.

– Во име на Владата и граѓаните му изразувам благодарност на претседателот на Европскиот совет, Доналд Туск, што за целиот петгодишен мандат не пропушти ниту една можност да го афирмира пријателството кон Северна Македонија и нејзините аспирации за да биде членка на ЕУ – изјави премиерот.

Тој истакна дека ова е период од голема важност за македонскиот народ и дека треба да останеме фокусирани на целта, а тоа е влез во Европската Унија.

Туск соопшти дека напорите на Македонија во последните неколку години биле извонредни и според него заслужуваме во октомври да ги започнеме преговорите за влез во ЕУ.

– Македонија преку решението за драматичните политички кризи во вашата земја, решение кое беше засновано на демократски принципи и преку вашите договори за пријателство со Република Бугарија и Преспанскиот договор со Република Грција, стана шампион на политичкиот рационализам и политичката зрелост во регионот, изјави Туск.

Тој дополни дека неговиот став останува дека Македонија направила се што е побарано за да започне преговори со ЕУ и им порача на лидерите на ЕУ да ја завршат нивната работа, бидејќи Македонија ја завршила својата.