Турскиот парламент вечерва го ратификуваше протоколот за приклучување на Финска кон Северноатлантската алијанса, со што е отстранета последната пречка оваа земја да стане НАТО-членка додека беснее војна во Украина, јавија светските медиуми.

„За ратификација на протоколот за пристапување на Финска во НАТО – 276 гласа, предлогот е прифатен. Честитки за Финска и нејзините граѓани“, изјави заменик-претседателот на парламентот Хајдар Акар.

Гласањето го поздрави генералниот секретар на НАТО, Јенс Столтенберг.

I welcome the vote of the Grand National Assembly of #Türkiye to complete the ratification of #Finland’s accession. This will make the whole #NATO family stronger & safer.

— Jens Stoltenberg (@jensstoltenberg) March 30, 2023

Турција беше последната од 30-те членки на Алијансата што го ратификуваше членството на Финска, откако унгарскиот законодавен дом го стори тоа неделава. Македонското Собрание протоколот го ратификува уште лани во јули.

Претседателот Реџеп Таип Ердоган неодамна изјави дека Финска ја обезбедила наклонетоста на Турција откако „презела конкретни чекори за одржување на ветувањата за сузбивање на групите“ составени од турски иселеници кои Анкара ги смета за терористички.

Финска и Шведска поднесоа барање за приклучување кон трансатлантскиот воен сојуз лани, како реакција на руската инвазија на Украина, но процесот беше блокиран од Турција и Унгарија. Парламентите на сите земји-членки на НАТО мора да ги ратификуваат новите членки.

Анкара и натаму го одложува одобрувањето на кандидатурата на Шведска. Власта на Ердоган наведува дека земјата не направила доволно за сузбивање на, според официјална Турција „терористичките“ групи, главно поврзани со курдските организации или со Фето, движењето на прогонетиот политички непријател на Ердоган, Фетула Ѓулен, кој живее во САД.

Шведските власти денеска оти има мали шанси земјата да му се приклучи на воениот блок на самитот во Вилнус во јули.

Столтенберг: Шведска ги исполни турските услови за членство во НАТО