Турската опозиција бесна: Повторувањето на изборите во Истанбул е чиста диктатура
Најголемата опозициона партија во Турција, Турската Републиканска народна партија, соопшти дека одлуката околу повторно одржување на изборите во Истанбул укажува на „чиста диктатура“.
Врховниот изборен одбор на Турција нешто порано одлучи повторно да бидат одржани локалните избори во Истанбул, откако владејачката партија на Ердоган се жалеше на наводни „бројни неправилности“.
„Секоја победа против владејачката партија за Правда и развој е нелегална. Овој систем ја надвладува волјата на народот и го занемарува законот кој не е ниту демократски ниту легитимен. Ова е чиста диктатура“, напиша на Твитер заменикот претедател на опозициската Републиканска народна партија, Онурсал Адигузел.
Турските медиуми пренесуваат дека Врховниот изборен одбор ја одобрил жалбата на владејачката партија и ги поништил резултатите од изборите одржани на 31 март во Истанбул, а новите избори би требало да се одржат на 23 јуни.