И покрај отварањето на границите, туристичките агенции сметаат дека неопходна е итна финансиска интервенција од државата бидејќи бизнисот изминатиот период претрпел многу како и дека и покрај отворањето на границите оваа сезона за нив ќе биде многу тешка.

Тие уште еднаш упатија апел до министерствата за економија и финансии да ги разгледаат нивните барања и да бидат повикани на разговор што е можно побрзо.

– Ние сме најпогоден сектор во периодот на пандемија, зашто се затворени нашите граници, а со тоа имаме забрана за вршење дејност. Нашиот приход изминатите 100 дена е нула, нашите трошоци се уште течат, имаме закупи за летување во странство, а не се знае дали воопшто ќе може да ги работиме и дали ќе имаме дозвола за влез во тие земји иако од страна на нашите власти во повеќе наврати беше најавувано дека ќе бидат отворени границите и дека ќе може да ја обавуваме нашата дејност. Имаме и откажани аранжмани на странски туристи за летување во нашата држава, се вели во писмото потпишано од околу 70 туристички агенции и превозници.

Тие уште еднаш ги соопштија нивните барања, целосно отворање на границите, воведување протоколи како во останатите европски држави, неповратна финансиска помош од 500 евра за фирми до пет вработени и од 1.000 евра за фирми со над пет вработени, минимална плата од 14.500 денари, платени придонеси, одложување на исплатата на кредитите, ослободување од ДДВ и аконтација до крајот на годината, одобрување бескаматни кредити за сите без никакви услови, а за оние веќе одобрените пролонгирање на грејс периодот од шест на 12 месеци.