Тунберг: Светските лидери веќе немаат изговори
Младата активистка, Грета Тунберг, вели дека децата низ светот не смеат повеќе да трпат празни ветувања од страна на светските лидери на годинешната конференција на Обединетите Нации за климатските промени, пренесува Ројтерс.
Обединетите нации во својот извештај напишаа дека ниту едно дете нема да избегне влијанието на глобалното затоплување.
Во првиот извештај од овој вид, кој денеска го објавија УНИЦЕФ, се вели дека сите 2,2 милијарди деца во светот ќе бидат изложени на климатските промени и под еколошки ризик, од катастрофални поплави до силни пожари.
Тунберг (18) вели дека извештајот на УНИЦЕФ потврди дека децата ќе бидат најтешко повредени од климатските промени, а светските лидери на конференцијата во ноември во Гласгов, ќе мораат да преземат нешто, а не само да зборуваат за тоа.
„Не очекувам од нив да го направат тоа, но ќе бидам повеќе од среќна ако грешам“ изјави Тунберг.
Според неа, децата се повеќе изложени на еколошките катастрофи отколку возрасните и тие треба навреме да бидат спасени.
Извештајот на УНИЦЕФ вели дека 1 милијарда деца во 33 африкански земји се соочуваат со „смртоносни комбинации“ од екстремни временски и сиромашни услови.