Европската унија вчера јасно порача дека Македонија и Албанија нема да бидат разделени во евроинтеграцискиот процес, наспроти изјавите на еврокомесарот Оливер Вархељи, но не понуди идеја како да се надмине идентитетскиот спор што Бугарија прво ѝ го наметна на Македонија, а потоа ја блокира.

Според Марко Трошановски од Институтот за демократија „Социетас цивилис“ после дипломатската офанзива во Брисел на премиерот Заев и министрите Никола Димитров и Бујар Османи се јасни неколку работи.

„Добро е што се реафирмираше намерата на Европската Комисија за Македонија и Албанија да останат во пакет во пристапниот процес кон ЕУ. Но, од друга страна не се случи никаков притисок кон Бугарија, не слушнавме за никаков предлог или идеја од ЕК за да се надмине спорот и да биде усвоена преговарачката рамка на која Бугарија стави блокада“ – вели Трошановски за „Слободен печат“.