На инфективното одделение во Општата болница во Велес денеска починаа тројца пациенти – маж и жена на возраст од 78 години, потврдени позитивни и уште еден маж на 71 година кој бил примен во тек на вчерашниот ден со многу мала сатурација и пневмонија типична за ковид, но не бил тестиран, информира портпаролот на болницата, Весна Неделковска Николова.

Бројот на починати во Велес и велешко од почетокот на пандемијата на ковид-19 се зголеми на 47.

Од вкупно 88 хоспитализирани пациенти со ковид на трите одделенија во велешката Општа болница, на инфективното има 59 пациенти, што воедно е најголема бројка на хоспитализирани од почетокот на пандемијата.

Инфективното одделение со 59 пациенти е преполно, а капацитетот по вторпат е проширен. На почетокот имаше 35 кревети, потоа 54 кревети, а сега 59 кревети, колку што има и пациенти во оваа одделение. Целосно е исполнето и интерното одделение Б крак со 15 пациенти колку што има и кревети. На физикалното одделение со 25 кревети има 14 пациенти.

Инаку од 88 пациенти, 73 се потврдени позитивни, девет се сомнителни и шест со негативни контролни тестови, а 30 од нив добиваат кислородна поддршка.