Тројца отсутни го одложија рочиштето за „Топлик“
Судијата од Кривичниот суд Осман Шабани беше принуден денешното рочиште за случајот „Топлик“ да го одложи за 11 декември, бидејќи денеска тројца инволвирани во рочиштето беа отсутни. Во судница не дојде јавен обвинител, адвокат на еден од обвинетите и еден обвинет, кој пак писмено го известил судот дека е во самоизолација поради контакт со заболен од коронавирус.
Предметот „Топлик“ се однесува на изградбата на населбата „Сончев град“, за која поради недостатоци настанати при склучување на договорот за нејзина изградба, буџетот бил оштетен за околу еден милион евра.
Во предметот обвинети се поранешниот министер за транспорт и врски Миле Јанакиески и пет други лица. Јанакиески, спротивно на Законот за јавни набавки составил Комисија за јавни наддавања на која и наложил да избере понудувач за купување и располагање со државно земјиште за изградба на елитниот комплекс „Сончев град“ во Сопиште, иако фирмата не ги исполнувала условите за тоа.