Луис Хамилтон на трката за Големата награда на Мексико дојде до 83. победа во кариерата и милиметри го делат од третата титула по ред, а шеста во кариерата. Возачот на Мерцедес можеше уште на трката во Мексико да ја обезбеди титулата доколку неговиот клупски колега, Валтери Ботас завршеше како петти или беше послабопласиран, но Финецот на крајот заврши на третото место.

Стратегијата на Мерцедес со едно влегување во боксот и промена на пневматиците и тоа порано од возачот на Ферари, Себастијан Фетел, му се исплатеше. Откако ги смени пневматиците на 47 кругови до крајот, Хамилтон ја чуваше предноста од две секунди во однос на Фетел и без проблеми дојде до триумфот.

Второто место му припадна на Фетел, трет беше Ботас, а по нив следеа Шарл Леклер од Ферари, а потоа и тандемот на Ред Бул, Александер Албон и Макс Ферстапен и Серхио Перез од Рејсинг поинт кој заврши на седмата позиција.  Наредната трка ќе се вози веќе во наредниот викенд во САД, а на Хамилтон му е потребно да освои само седум бодови повеќе од Ботас за да ја освои титулата.