„Трите круни“ во Скопје, на ред се контролите со Шведска
Откако одиграа два пријателски натпревари со Романија во Крајова, македонските одбојкари тренираа во салата „Кале“, каде што денеска и в недела од 17.30 часот ќе се тестираат против Шведска.
Што се однесува до здравствениот билтен, Васе Михаилов има стомачен вирус и во четвртокот не тренираше, а Марко Јуниор Стошиќ и натаму ја санира повредата на стомачниот мускул.
Во пресрет на продолжениот викенд во којшто со Швеѓаните имаме закажано заеднички тренинг в сабота, работат 14 одбојкари. Селекторот ќе има уште две средби за да реши кои играчи ќе го носат дресот на Европското првенство во септември.
Најпрво на 30 август овој месец со Украина во полуфиналето на турнирот „Чајка“, а ден потоа со Белгија или со Бугарија во зависност од резултатот од нивнот полуфинален дуел. На 5 и 6 септември ќе бидеме гости на Австрија во пријателските средби во Сент Полтен, а веќе на 12 септември ќе дебитираме на европските шампионати. Прв противник во Љубљана ќе ни биде Финска, а ќе играме и со Турција, Русија, Белорусија и Словенија.