Во директен судир на две патнички возила со струмички регистарски ознаки, попладнево се повредени 13 луѓе. Сообраќајката се случила попладнето во 16:20 часот на патот Струмица-Валандово, на превојот Валандовски Рид.

Портпаролката на СВР Струмица, Александра Трајанова, информира дека имало повеќе повредени лица кои се пренесени на лекување во болницата во Струмица. Таа за утре најави повеќе детали за сообраќајката.

Според информациите од директорката на струмичката болница, Катерина Кузмановска, едно дете на шестгодишна возраст и една жена се со потешки повреди и се пренесени на понатамошно лекување во Клиничкиот центар во Скопје, додека останатите се со полесни повреди и се на лекување во Струмица.

Во извлекувањето на повредените учествувало и противпожарно возило, а екипа на полицијата извршила увид.