Интензивните и непрекинати врнежи од дожд во изминатите неколку дена го зголемија нивото на реката Вардар во Велес за повеќе од трипати.

– Ако на 1 јануари нивото беше 45 сантиметри, на 7 јануари беше 90, вчера достигна 110 сантиметри, додека денеска на мерното место во Велес кај Стар мост нивото изнесува 150 сантиметри, информираат од УХМР. Оттаму потенцираат дека ова ниво е далеку над просекот за јануари, кој изнесува 82 сантиметри.

Покрај високото ниво денеска нема излевање на Вардар во Велес. Во Градскиот парк се поплавени првите дрвја до брегот. Среде Вардар, кај Градскиот парк, имаше заглавено и големи трупци од дрвја.

Поради надојдените води по Вардар низ центарот на Велес пловеа стотици пластични шишиња, собрани од надојдените води на реката од бреговите долж реката.

Од УХМР попладнево соопштија дека и денешните непрекинати врнежи придонеле за зголемување на нивото на водата во реките, особено на река Вардар во горниот тек и нејзините притоки. Оттаму посочуваат дека е високо и нивото на реката Бабуна кај Богомила и далеку над просекот, но засега нема излевање. Високо е нивото и на реката Тополка во реонот на велешко.