Во изминативе години сведоци сме на енормни и брзи збогатувања на јавни функционери, а за ниту еден од нив не е почната постапка за проверка на нивниот имот со споредба на состојбата пред да стане функционер и откако му завршила функцијата, вели адвокатката Весна Николовска, која долги години застапува клиенти во кривично-правни процеси.

– Никој не е кривично гонет. Така е веќе 30 години. Мора да се стави точка на незаконитоста и бескрајното незаконско богатење на избраните и именувани функционери – нагласува Николовска.

ДКСК, според неа, за секоја утврдена незаконитост треба да ја извести јавноста зашто само на таков начин ќе може да ги раздвижи инертните сили во Обвинителството.

– Потребен е закон кој ќе ги „отрезнува“ функционерите и ќе им „дише во врат“ кога ќе помислат да се збогатат незаконски – вели Николовска.

Според сегашниот закон, Државната комисија за спречување корупција нема право да ја следи имотната состојба на избраните и именувани функционери по завршувањето на мандатот.

Претседателката на ДКСК, Билјана Ивановска смета дека постои реална потреба од донесување на закон за потекло на имотот како дополнителна алатка во борбата за спречување на корупцијата.