Тренерот на Елмас и Наполи амбициозен: Сакаме да ја освоиме и Лигата на шампионите
Наполи ја совлада Специја со 3:0 на гости во 21 коло од Серија А, дефинитивно клубот од Неапол е најголем кандидат сезонава да ја освои титулата (прва од 1990 година). Моментно е на првото место на табелата со 56 бодови, додека Интер и Рома имаат по 40.
Тренерот на „Наполитанците“ и македонскиот репрезентативец Елиф Елмас, Лучано Спалети изјави дека неговиот клуб сака да ја освои и Лигата на шампионите, пренесуваат италијанските медиуми.
Наполи на 21 февруари ќе го одигра првиот натпревар од осминафиналето на ЛШ против Ајнтрахт во Франкфурт.
– Ние имаме намера да ја освоиме и Лигата на шампионите. Тоа е наша одлука. Ќе се обидеме да постигнеме нешто за доброто на овие навивачи. Мораме да бидеме горди на љубовта што ни ја даваат Наполитанците и да ја пренесеме на теренот – вели Спалети.
Следниот меч во најсилното италијанско првенство составот од Неапол ќе го има на 12 февруари дома против Кремозене.