Тренчовски: Сакаме да го однесеме првиот куп трофеј во Струмица
На официјалната прес – конференција двајцата тренери, Александар Таневски (Македонија Ѓ.П.) и Југослав Тренчовски (Академија Пандев) ги споделија своите очекувања околу финалната пресметка.
Тренерот на Академија Пандев, Југослав Тренчовски вели дека финалето од Купот на Македонија за клубот е некој нов предизвик.
– Ние сме понеискусна екипа, меѓутоа имаме квалитетни фудбалери и играчи со потенцијал. Македонија Ѓ.П. заслужува целосен респект, се работи за тим кој игра отворен и допадлив фудбал. Задоволство ни е третото место во шампионатот, но уште поголем успех ќе биде пехар во Купот на Македонија – рече Тренчовски.
Признава дека потајно имаат притисок, затоа што сакаат заедно да ја однесат првата Куп-титула во Струмица, но од друга страна не забораваат дека Македонија Ѓ.П. елиминираше фудбалски брендови и во составот има играчи како Остоја Стјепановиќ, Кировски, Божиновски и останатите кои имаат искуство и квалитет.
Од друга страна, стратегот на Македонија ЃП, Александар Таневски вели дека се работи за два тима што имаат обезбедено по нешто во првенството, ѓорчепетровци опстанокот, а Академија Пандев настапот во Европа.
– Мислам дека на вакви натпревари се заборава притисокот и заморот. Академија Пандев игра допадлив фудбал. Можеби ќе треба да бидеме претпазливи, но нема да го менуваме стилот. Мислам дека тоа ќе ни донесе успех. Искуството е на наша страна, имаме играчи со четири до пет финалиња – изјави Таневски.