Министерката за труд и социјална политика Јована Тренчевска денеска присуствуваше на годишното собрание на Организацијата на работодавци на Македонија. Тренчевска се осврна на досегашните законски решенија во надлежност на Министерството, како и законите чија подготовка е во тек.

Од Министерството за труд и социјална политика информираат дека за време на средбата Тренчевска го потенцирала значењето на социјалниот дијалог во едно општество како единствен начин за носење на најсоодветни и најодржливи решенија во согласност со сите релевантни чинители во државата.

– Не треба да заборавиме дека за да постои социјален дијалог, кој нема да биде елемент предвиден само на хартија, мора да постојат силни и независни синдикати и здруженија на работодавци, со капацитет кој ќе им овозможи да бидат рамноправни во преговорите, да има политичка волја и посветеност за одржување на социјалниот дијалог од страна на сите учесници, да се почитува слободата на здружување и правото на колективно договарање, како и соодветна институционална поддршка, посочи таа.

За време на состанокот, од МТСП информираат дека се дискутирало и за обезбедување стабилна политичка и граѓанска клима која ќе им овозможува на синдикатите и здруженијата на работодавци да преговараат слободно, како и за значењето на Економско-социјалниот совет кое како трипартитно тело на национално ниво, изминатиот период, редовно е консултиран за најважните предлог закони, политики и мерки во областа на трудот.

– Министерката изрази заблагодари што ОРМ е секогаш стабилен партнер од доверба, партнер кој ги гледа интересите на целата држава и кој сериозно придонесува за социјален дијалог, онаков каков што треба да биде, основа за креирање на работни места и зачувување на постоечките, за зголемување на продуктивноста, а со тоа и на профитот и платите, економски напредок и обезбедување на социјален мир и праведност, се додава во соопштението од МТСП.