Азербејџан и Ерменија денеска разменија тела на 200 загинати во регионот на Нагорно-Карабах, соопштија руските државни медиуми, повикувајќи се информации на Црвениот крст.

– Телата беа разменети во присуство на руските мировници, изјави шефот на Меѓународниот комитет на Црвениот крст, Питер Маурер.

Повеќе од 1.000 лица се убиени во шестнеделниот конфликт меѓу Азербејџан и соседна Ерменија за регионот на Нагорно-Карабах. Територијата која веќе 25 години беше контролирана од Ерменците, Обединетите нации ја сметаат за дел од Азербејџан.

Со последната воена офанзива, што почна на 27 септември, Азербејџан оствари значителни територијални придобивки, а како дел од мировниот договор постигнат минатата недела меѓу двете земји и руската страна, Ерменија му отстапи делови од овој регион на Азербејџан.