Трамп: Ставаме крај на ерата со бесконечни војни (ФОТО+ВИДЕО)
Претседателот на САД, Доналд Трамп, кој се соочува со критики поради најавата за повлекување на илјадници американски војници од Германија, им рече на дипломираните студенти на Воената академија „Вест Поинт“ дека нивната работа ќе биде да ги „бранат виталните интереси на Америка“ и да не учествуваат во „бескрајни војни“ во далечните земји.
Објавувањето на плановите на Трамп да префрли 9.500 војници од Германија, еден од најголемите сојузници на САД, во Полска и на други места, ги налути германските власти и предизвика загриженост во американскиот Конгрес дека земјата се повлекува од светската сцена.
Обраќајќи се на питомците по повод нивното успешно завршување на школувањето во Вест Поинт, Трамп рече дека работата на американски војници не е да градат и да обновуваат странски држави, туку „да ја бранат нацијата на Америка и тоа силно, од надворешни непријатели“.
„Завршуваме ера на бесконечни војни“, рече Трамп. Работа на американските сили не е да „решаваат стари конфликти во далечните земји за кои многумина дури и не слушнале“, рече тој.
Републиканците го критикуваат
Трамп ги повлече американските трупи од Сирија за време на неговиот претседателски мандат и со најавувањето дека го намалува американскиот ангажман, создаде притисок врз сојузниците да плаќаат повеќе за нивната одбрана.
Во релативно ретка критика на неговата партија, 22 републиканци на Комитетот за вооружени услуги рекоа дека намалувањето на бројот на американските трупи во Германија ќе и наштети на националната безбедност и ќе ја охрабрат руската агресија.
Во своето обраќање пред повеќе од илјада кадети, Трамп само индиректно се осврна на сегашното прашање на расната неправда во САД, велејќи дека питомците се пример за американска разноликост.
-Дојдовте од фарми и од градови, големи и мали држави, од секоја раса, религија, боја и верба. Но, кога влеговте во оваа област, станавте дел од еден тим и едно семејство што гордо и служи на обединетата американска нација- рече тој. .