Новоизбраниот американски претседател Доналд Трамп изјави дека рускиот претседател Владимир Путин сака да се сретне со него и во моментов се договара средба, но не прецизираше временска рамка кога ќе се одржи.

Трамп во четвртокот пред состанокот со републиканските гувернери во Мар-а-Лаго во Палм Бич, Флорида, рече дека војната во Украина мора да заврши, објави Ројтерс.

Враќањето на Трамп во Белата куќа на 20 јануари ги зголемува надежите дека ќе се најде дипломатско решение за војната во Украина. Соединетите Американски Држави досега ѝ обезбедија на Украина помош од 175 милијарди долари, вклучително и повеќе од 60 милијарди долари воена помош.

Сепак, неизвесно е дали помошта ќе продолжи со истото темпо откако Трамп ќе ја преземе функцијата, бидејќи тој рече дека сака војната во Украина да заврши што е можно поскоро.

Портпаролот на Кремљ, Дмитриј Песков, во четвртокот изјави дека Путин ќе ја поздрави поканата на Трамп за средба, но истакна дека досега немало официјално барање.

„Посоодветно би било да се почека Трамп прво да ја преземе функцијата“, рече Песков, пренесе Танјуг.

Украинскиот претседател Володимир Зеленски изјави дека Трамп може да одигра одлучувачка улога во исходот на војната во Украина и, како што наведе, да помогне „да се запре Путин“.