„Трамонтана“ е првиот роман на познатата поетеса Наташа Сарџоска
Поетесата, преведувачка и антрополог Наташа Сарџоска го објави својот прв роман „Трамонтана“. Дејството на романот се одвива во Париз и во Скопје, но и во Виена и во Охрид, а главните ликови испреплетуваат повеќе карактерни специфики на културолошките и социјалните мрежи на кои им припаѓаат.
Станува збор за психолошки роман, во кој двата главни лика Алма и Алба се длабински прикажани во нивната најсуштинска интимност, сѐ до нивно сплотување, сѐ до нивно препознавање како двојнички.
Сарџоска пишува женско писмо со силен поетски израз и естетски набој. Отуѓеност, осаменост, анонимност, промискуитет, празнина, слобода, неконформизам, но и трговија со луѓе и лицемерие на хуманитарните и меѓународните организации, како и корупција на македонскиот систем се само дел од неколкуте теми што ги разработува Сарџоска во оваа повеќеслојна приказна за потрагата по слободата преку неприпаѓањето, слобода што одамна му е одземена на човекот, слобода што е метафорично прикажана низ призма на каталонскиот свиреп и брутален ветер трамонтана, кој го обележува и настанокот на дејството, детството на главниот лик, и завршетокот на дејството, заминувањето на главниот лик кон непознатото.
Трамонтана е морски ветер што зад себе остава пустош и празнина и алузија дека овој роман ќе ве одведе целосно отаде празнината на востановените рамки и геометрии на постоењето.
Книгата ја објави издавачкиот центар „Три“, а беше промовирана на годинашниот Саем на книгата во Скопје. Авторска промоција на книгата ќе се одржи и на 23 септември, во 18 часот, на „Зелената тераса“ на ГТЦ.
(Текстот е објавен во „Културен печат“ број 97, во печатеното издание на весникот „Слободен печат“ на 18-19 септември 2021)