Четиригодишно девојче од Бања Лука починало откако со часови седело заклучено во автомобил, известуваат денеска локалните медиуми.

Порталот „Независни новини“, повикувајќи се на извори блиски до истрагата, објави дека девојчето починало од високите температури, а засега не е јасно како членовите на семејството ја оставиле сама во автомобилот.

– Во такви околности, температурата во возилото е многу повисока во однос на надворешната температура, истакнуваат соговорниците на „Независни новини“.

Обвинителството во Бања Лука потврдува дека се истражува случајот за смртта на девојчето кое во текот на вчерашниот ден е пронајдено во автомобил паркиран во дворот на семејната куќа во Доња Пискавица. Исто така, ќе биде направена и обдукција со цел да се утврдат точните околности и причините за смртта.