Голема трагедија се случи на денешните квалификации за третата трка од календарот на кружни патеки во Кичево. Александар Кочевски кој беше дел од квалификациите во борбата за обезбедување на што подобра позиција, ја загубил контролата на возилото и бавно завршил во зелениот простор околу патеката.

АКК Кастм Кар Рејсинг и Рено Спорт известуваат за немилиот настан што се случи попладнево, во квалификациите за третата трка од тековната сезона од календарот на кружни патеки:

„Во последниот круг за нашиот драг колега Александар Кочевски (роден 1961), а круг за ладење на крајот на првиот дел од квалификациите за повеќето од другите возачи во конкуренцијата „Твинго Куп”, Кочевски поради срцев удар со смртни последици, како што нè информира лекарскиот тим кој со сите сили се обиде да го реанимира Кочевски во ургентниот центар во Кичево, ја загубил контролата на возилото и бавно завршил во зелениот простор околу патеката.

Нашата екипа и судиите, заедно со медицинскиот тим, веднаш пристигнаа на лице место, Кочевски беше итно префрлен во Ургентниот центар во Кичево, каде по долга борба на целокупниот медицински персонал за негово реанимирање, беше констатирана неговата смрт.

Во овие тешки времиња за неговите најблиски, АКК Кастм Кар изразува сочувство на семејството, фамилијата и пријателите на починатиот Александар Кочевски.

Ние како клуб, изјавуваме дека ги преземавме сите стандарни мерки за организација на една трка, а местото, односно правецот по свиокот три, а пред свиокот четири на патеката во Кичево, не е место на кое може да се случи возачка грешка или организациски пропуст, кој би довел до ваков или сличен немил настан.

Колегите од „Твинго Куп” нема да ја возат закажаната трка, но трките в недела во другите конкуренции ќе се одржат, а следните трки што ќе се одржат во нашата конкуренција, ќе бидат насловени „Ин Мемориам – Александар Кочевски” во чест на нашиот драг колега.

Воедно, „Рено Спорт” кој е организаторот на „Твинго Куп”, заедно со сите натпреварувачи учесници на трките, изразуваат длабоко сочувство до најблиските на Александар Кочевски, а нивната следна трка исто така ќе се вози во негова чест“.

АКК Кастм Кар Рејсинг

Рено Спорт