Франческо Тоти одлучи по 30 години минати во Рома, да си замине од римскиот клуб. Иконата на навивачите и на клубот, не го криепе разочарувањето од сопствениците кои сакаа по секоја цена да го тргнат Тоти од управата. Тие му понудија да биде амбасадор на клубот, но Тоти ја одби понудата.

– Главната цел на некои луѓе беше да се тргнат Римјаните од Рома. Во претходните осум години откако сопственици се Американци, работат да не тргнат од клубот, на крајот успеаја во тоа – вели Тоти.

„Принцот на Рим“ нема намера да се враќа на „Олимпико“ додека не си замине сопственикот Палота.
– Би се вратил во Рома кога ќе дојдат други соппственици и ќе веруваат во мене. Никогаш нема да кажам лош збор за клубот, но се чувствувам многу полошо отколку кога ја завршив кариерата. Имам чувство како да умирам. Мноу луѓе ми зборуваа дека претставувам товар за клубот и дека му стојам на патот. Тие зборови многу ме болат. Палота и Балдини никогаш директно во лице не ми кажаа да останам во клубот, секогаш тоа одеше преку други луѓе. Некои луѓе ми зарија нож во грбот, се чувствувам предадено и затоа ја напуштам Рома – вели Тоти.