„Тоше Проески има само датум на раѓање“: Фановите од цел Балкан дојдоа во Крушево

Фото: Принтскрин - МТВ Вести

Денеска се одбележуваат 42 години од раѓањето на големата македонска и балканска музичка ѕвезда, на хуманитарецот и човекот со ангелско срце – Тоше Проески. Тоше има само датум на раѓање и тој засекогаш ќе живее во срцата на секој од нас.

Тоше и неговите фанови / Фото: Приватна архива

Обожавателите и приврзаниците на големата македонска музичка ѕвезда Тоше Проески денеска на Гумење во родното Крушево го одбележаа неговиот 42 роденден. Веќе 16 година се одбележуваат значајните датуми за Тоше без него, но со почит, сеќавање, и радост што го имавме. На вечното почивалиште на Тоше Проески на Гумење во Крушево, почит оддадоа институции и негови привзаници од земјава и од странство.

Тоше Проески со малечко девојче на неговиот последен концерт / 5 октомври 2007 / Фото: ROBERT ATANASOVSKI / AFP / Profimedia

Стела Прислан Фејс од Загреб, Хрватска секогаш е во Крушево и на Гумење за посебните датуми за Тоше затоа што смета дека тој имаше само ден на раѓање.

– Пак сме во Крушево, на свој начин со Тоше. Тој останува љубов, музика и вечност. Македонија треба да е горда што го имаше. Неговиот ден на раѓање носи дополнителни емоции, а за нас е вечен. Секоја година доаѓам. Тоа е потреба. Ова ни е втор дом – рече Стела Прислан Фејс.

Фото: Стела Прислан Фејс / Принтскрин – МТВ Вести

Во спомен домот „Тодор Проески“ на Гумење, најпосетуваниот музеј на овие простори, со повеќе манифестации беше одбележан денот на 42-иот роденден на Тоше. Изложби, 42 маички со мотив што го претставуваат Тоше, големиот музичар, хуманитарец и човекот со големо срце. Централно место имаат експонатите и музичко-сценскиот настан насловен „Ангел си ти“ на кој Андријана Јанеска и Бојан Стојков во придружба на Џез Сценарио од Битола, во аранжман на професорот по пијано и диригирање Вангел Мажески, ги изведуваа хитовите на Тоше. Беше отворена изложбата на дела на уметничката Марија Бојкоска од ликовната школа „Тоциновски“ од Скопје, а беа промовирани и делата од 26-тата керамичка колонија од Велес со мотиви врзани за Тоше Проески.

Фото: Принтскрин – МТВ Вести

Лефкија Гажоска, директорка на спомен-куќата „Тодор Проески“ вели дека посебна е приврзаноста со Тоше, со неговата музика и неговото дело.

– Во 11.15 часот во 1981 година се роди Тоше Проески. И настаните, на некој начин, ги врзавме така. Со промоциите на изложбите, а посебен е музичкиот настан „Ангел си ти“. Спомен домот ги одбележува сите значајни датуми и сѐ што е поврзнано со Тоше Проески. Многу ни е мило што заедно со средното училиште „Маца Овчарова“ од Велес, со специјалната паралелка успеавме да испечатиме 42 маички со победничкиот мотив од нивната грнчарска меѓународна работилница, посветена на Тоше. Песната на Тоше „По тебе“ како спомен-куќа ја посветуваме на него, која остави голема трага. По него не е ништо исто, но ние сакаме да ги одбележиме убавите моменти, неговата музика да остане вечно во сеќавањето – рече Гажоска.

Фото: Принтскрин – МТВ Вести

Дијана Попанов, дефектолог од Велес рече дека грнчарската меѓународна колонија која опфати 31 училиште годинава беше посветена на Тоше.

– Сета љубов за Тоше е отсликана на керамичките чинии изработени во работилницата, а најдобриот мотив е ставен на 42 маички што се промовираа денес – рече Дијана Попанов.

Атанас Ташкоски, 14-годишен крушевчанец ја освои првата награда и неговиот мотив за Тоше е на маичките што им се нудат на посетителите.

– Кога се пријавив, веднаш нешто ме натера да нацртам со сина боја. За Тоше, големиот музичар и хуманитарец, зашто некои бои го опишуваат повеќе – рече Ташкоски, ученик од Крушево.

Фото: Принтскрин – МТВ Вести

Дека Тоше е синоним и за љубов потврдува младата Русинка Наташа Кондрашова. Таа својата љубов ја најаде во сопругот Драган од Крушево.

– Од 2012 година доаѓам од северна Русија во Крушево за Тоше. И пред три години ја најдов својата љубов во сопругот Драган и станав крушевчанка. Тоше нѐ поврза, со радост – вели крушевчанката Наташа.

За Тоше Проески се навестува и филм. Животот го загуби во сообраќајна несреќа кај Нова Градишка Хрватска на 16 октомври во 2007 година.

Извор:ТВ21

Интервју со Наташа Кондрашова-Атанасоска, фан на Тоше Проески: Љубовта кон Тоше ме донесе од суровиот Арктик во Крушево

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот