Жозе де Толедо на почетокот од сезоната пристигна во редовите на европскиот шампион Вардар како големо засилување на позицијата на лев нек, но тешката повреда на коленото, а потоа и операцијата го оневозможија Бразилецот да дебитира во „црвено-црниот“ дрес.

Но, сега повредата е минато за Толедо и тој под палката на новиот тренер Стефче Алушовски се подготвува за вториот дел од сезоната каде Вардар го очекува голема борба за пласман во еллиминациите во Лигата на шампионите, но и во одбраната на трофеите во СЕХА лигата и во домашните натпреварувања.

– Имав компликувана операција, не толку едноставна како што мислат луѓето. Не сум среќен со ситуацијата во која се најдов, но тоа е нормален процес што треба да го поминете постоперативно. Нетрпението те излудува, не можам да дочекам да почнам да играм. Имав долга рехабилитација и тешко е. Не беше лесно, но се подобро се чувствувам и месецов почнав тренинзи со тимот – вели Толедо во интервјуто за официјалната веб-страница на РК Вардар.

Тој со нетрпение го очекува првиот настап за Вардар, и е подготвен за предизвиците во вториот дел од сезоната.
– Ми недостигаше ракометот, ми недостигаше да бидам со екипата. Најмногу ми недостигаше тоа што од почетокот на сезоната уште не сум играл со дресот на Вардар. Време е да го облечам дресот, да застанам пред навивачите на Вардар и да излезам на теренот во оваа прекрасна сала со неверојатна атмосфера за поддршка.

Подготвен сум за овој предизвик. Затоа и сум тука. Ќе бидат тешки месеци пред нас. Предизвиците се тешки, независно дали е СЕХА лига, ЕХФ ЛШ или домашното првенство. Секој натпревар треба да го играме како клучен и нема да биде лесно. Но во тоа е и убавината, да имаш тешки предизвици и да можеш секој пат да дадеш 100 проценти – потенцира Толедо.