Водечкиот јапонски производител на автомобили „Тојота” во четвртокот објави дека продал 45,3 проценти помалку возила во месец април отколку во истиот период лани, заради намалена економска активност во времето на пандемијата со коронавирусот.

Продадени се вкупно 472.703 возила минатиот месец, вклучувајќи ги Daihatsu Motor и Hino Motor.

Производството е смалено за 51,1 процент, на 445.014 возила, покажува извештајот.

Компанијата го стопираше производството во многу делови на светот, како резултат на мерките за спречување на ширењето на коронавирусот. На крајот на март, компанијата повторно започна со работа во Кина и постепено го обновува производството во некои други земји.

Во тековната финансиска година која завршува во март 2021 година, тие очекуваат продажбата да падне за 14,9 проценти, на 8,9 милиони возила.

Во средината на месецот, проценија дека поради пандемијата на коронавирусот, нивниот профит во новата финансиска година ќе опадне за 79,5 проценти, на 500 милијарди јени (4,6 милијарди долари).