Судечкиот совет за случајот „Титаник“ на Специјалното јавно обвинителство (СЈО) го одложи денешното рочиште и истото го презакажа за 12 август.

Овој процес е во доказна постапка и сè уште се изведуваат материјални докази предложени од СЈО, односно станува збор за околу 5.900 материјални докази, меѓу кои има барања за издавање лични карти, изјави за ополномоштени лица, извадоци од сметки, потврди и други документи и докази за злоупотреба на средства за финансирање на политичка кампања од 2013 година.

Во овој случај освен поранешниот премиер Никола Груевски кој е во бегство, обвинети се Кирил Божиновски, Миле Јанакиески, Гордана Јанкулоска, Билјана Бришкоска Бошковски, Илија Димовски, Мунир Пепиќ, Едмонд Темелко, Леко Ристоски, Кирил Тодоровски, Катерина Веловска, Станко Коруновски, Коста Марковски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашјаковска.

Тие се осомничени за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања.