Тинејџерите блескаат на УС Опен, Радукану трета квалификантка која ќе игра во четвртфиналето
Шпанецот Карлос Алкаразс ги воодушеви тениските фанови и стана најмладиот четвртфиналист на УС Опен во модерната ера. Тинејџерката Лејла Феррнандес во Њујорк успеа да победи две поранешни шампионки на УС Опен и поранешни тениски број 1 на ВТА ранг листата, Наоми Осака и Анџелик Кербер, а вечерва уште една тинејџерка испиша историја.
Ема Радукану ја совлада Шелби Роџерс со 6:2,6:1 и стана третата тенисерка која од квалификациите дојде до четвртфиналето на последниот годинешен грен слем турнир.
Роџерс ги освои првите два гема, а потоа тенисерката која е родена во Канада и има романско и кинеско потекло, а настапува за Велика Британија направи неверојатна серија од 11:0.
Противничка на Радукану во четвртфиналето ќе и биде олимписката шампионка Белинда Бенчич која ја победи Ига Швјонтек со 7:6,6:3.
Во машка конкуренција, во дуелот на двајцата тенисери кои прв пат играат во осминафиналето на еден грен слем турнир, Јужноафриканецот Лојд Херис го совлада Рајли Опелка од САД со 6:7,6:4,6:1,6:3 и си закажа четвртфинална пресметка со Александер Зверев.