Новак Ѓоковиќ не доби шанса по втор пат во кариерата да биде актуелен шампион на сите четири Гран слем турнири. Најдобриот светски тенисер е поразен во полуфиналето кое се играше два дена од Дониник Тим и не доби шанса за нова 55. пресметка со Рафаел Надал. Австрискиот тенисер славеше со 3:2 во сетови и тоа со 6:2,3:6,7:5,5:7,7:5.

По вчерашниот прекин при 1:1 во сетови, денеска, Тим прв го зададе ударот, го доби третиот сет со 7:5 и најави дека е подготвен да го предизвика Ѓоковиќ.

Во четвриот сет, по почетните неколку брејкови од двајцата тенисери, Ѓоковиќ успеа да поведе со 4:2 но одговорот дојде многу брзо, Австриецот возврати со ри-брејк. Долгите поени редовно му припаѓаа на Доминик Тим, додека Ѓоковиќ се мачеше да го задржи својот сервис. Но и со таква игра успеа да обезбеди одлучувачки петти сет откако со 7:5 го доби четвртиот сет.

Тим веднаш направи брејк и поведе со 3:0, а при 4:1 во гемови, играта беше прекината поради дожд. Откако се стабилизира времето над Париз, Ѓоковиќ повторно успеа да се врати од мртвите и израмни на 5:5, но со неколку лоши сервиси му овозможи на Доминик Тим при 5:6 да направи брејк и за прв пат да се пласира во финале на Гран слем турнир, каде го очекува Рафаел Надал.