Белоруската опозициска лидерка Светлана Тихановскаја изјави дека не знае кој би можел да ја заземе претседателската функција по новите избори во Белорусија, но имајќи предвид дека сите белоруски жени кои излегоа на улиците „покажаа отпор и сила на карактер”, на чело на државата може да дојде и една жена.

– Протестите против изборите, чиј исход во корист на сегашниот владетел сè уште се опишува како изманипулиран, ги зголемија шансите за една жена на кормилото на државата, рече Тихановскаја за Дојче веле.

Пред демонстрациите, малку граѓани размислуваа за прашањето за правична распределба на државните позиции, но тоа, според Тихановскаја, се смени.

– Можеби една жена навистина ќе стане претседател. Затоа што жените покажаа дека понекогаш се посилни од мажите, рече Тихановскаја која по изборите избега во Литванија.