Тиафо: Не му се извинив на Федерер и немам намера да го сторам тоа
Збогувањето на Федерер со тенисот го расипаа Френсис Тиафо и Џек Сок, кои беа подобри од Швајцарецот и Рафаел Надал минатиот петок на Лејвер купот.
Многу навивачи сакаа Федерер да победи бидејќи тоа му беше последен меч во кариерата, но американските тенисери на крајот се радуваа на триумфот.
По завршувањето на Лејвер купот, новинарите го запрашаа Тиафо дали му се извинил на Федерер зошто го победиле во неговиот последен меч.
– Секако дека не се извинив. Сакав да биде среќен, но немам за што да се извинувам. Тој е оној што треба да се извинува бидејќи во изминатите 24 години ги победи буквално сите тенисери. Не, нема да се извинувам, но ќе му се заблагодарам што беше дел од овој голем турнир и за се што направи за тенисот – изјави Тиафо.
Тиафо има одиграно три дуели против Федерер и на сите три загубил, а најблиску до триумф беше во 2017 година на УС опен кога играше пет сета, на крајот Швајцарецот се радуваше.
– Федерер е класа. Мило ми е што го запознав и што можам да го наречам пријател и колега. Му посакувам се најдобро во остатокот од животот. Но, да се извинам – нема да го направам тоа – додаде Тиафо.