Цената од 15 денари за една пластична кеса сè уште не „стасала“ до пазарите, а тезгаџиите воопшто не прават проблем при пакувањето на зеленчукот и овошјето. Велат ќе работиме вака сè додека имаме залихи или додека не почнат да казнуваат. До тезгите висат снопови во сите бои и големини, исто како и порано, а продавачите не им се лутат на муштериите ако побараат и понекоја ќеса фазла.

– Не е во ред да наплатуваме по 15 денари, па дури и за една салата. Имаме залихи и ќе тераме вака сè додека не нè казнат – велат тезгаџиите.

Се забележува дека граѓаните доаѓаат подготвени со колички или со поголеми платнени торби, а има и такви што раздиплуваат веќе користени кеси од дома.

– Пријатно сум изненадена што овие кеси не се наплатуваат. Понесов од дома резерва, но никој не ми побара. Не е добро ако и тука почне да се наплатува по 15 денари – вели една скопјанка.

Во меѓувреме, на одделите за овошје и зеленчук во големите маркети има книжни кеси, кои не се наплатуваат, но некаде има и известувања со кои граѓаните „се молат да ги користат разумно“.

– Првиот ден се грабаа по десетина книжни ќеси, моравме да ги ловиме муштериите и да ги опоменуваме. И ние сме задолжени со овие кеси – ни се пожали продавачка во маркет, покажувајќи ни колку „вишок хартиени кеси запленила од муштериите“.