Тесна трка помеѓу кандидатите за „Оскар“ за најдобар режисер
Пресекот на филмовите во категоријата за Оскар за најдобар режисер за оваа година ветува тесна трка меѓу моќната селекција од филмови и славни режисерски имиња.
Една од најважните награди што ги доделува американската Академија за филмски уметности и науки е Оскарот за најдобар режисер. Тука ги претставуваме годинашните номинации за Оскар, што ќе се додели на 27 март на најдобриот режисер.
По многу години поминати на огромни франшизи, познатиот актер и режисер Кенет Брана го направи „Белфаст“, својот најличен филм досега, користејќи ја пандемијата како повод за рефлексија кон минатото. Џејми Дорнан е главниот актер во полуавтобиографијата посветена на работничката класа во Белфаст за време на нередите во 1969 годинa во Ирска. Филмот доби седум номинации: најдобра фотографија на филм, најдобра режија, најдобро оригинално сценарио, најдобри споредни актер (Чиаран Хиндс) и актерка (Џуди Денч), и најдобра песна (Ван Морисон). Освен Оскарите, овој филм доби и шест номинации на 75-тото издание на наградите што ги доделува Британската академија за филмска и телевизиска уметност (БАФТА).
Со „Вози го мојот автомобил“, Јапонецот Рјусуке Хамагучи, освен во категоријата за најдобар режисер, влегува и во други од најважните категории за Оскар, како онаа за најдобро приспособено сценарио. Во филмот, Хидетоши Нишиџима глуми театарски режисер и вдовец, чиј живот драматично се менува кога прифаќа да работи на драмата „Вујко Вања“, што ќе го поттикне да размислува за животот на неговата покојна сопруга. Освен за најдобар режисер, филмот е номиниран и во категориите за најдобра фотографија на филм и за најдобар филм од неанглиско говорно подрачје.
„Пица со ликорис“ на режисерот Пол Томас Андерсон ја раскажува приказната за љубовта на Алана и Гери во 1973 година во Калифорнија. Со овој филм, Андерсон е номиниран и во категоријата за најдобро оригинално сценарио. Впечатливо е и тоа дека режисерот вклучува двајца нови и многу талентирани актери, Алана Кејн и Купер Хофман, кои изненадуваат со својот освежувачки перформанс.
Вестерн-драмата „Моќта на кучето“ на режисерката Џејн Кампион има дури 12 номинации за овогодишните награди, и тоа за најдобар филм, режија, адаптирано сценарио, актер, две номинации за најдобар спореден актер и за најдобра споредна актерка, најдобра кинематографија, продукција, музика, звучни ефекти и монтажа. Приказната се одвива во 1925 година во Монтана. Филмот, во кој глумат мегапознатите актери Бенедикт Камбербач и Кирстен Данст, ја раскажува приказната за ранчер што љубомори на својот неодамна оженет брат. „Моќта на кучето“ победи и во двете најважни категории на британскиот фестивал БАФТА, за најдобар филм и најдобра режија.
Филмот „Вест сајд стори“ на Стивен Спилберг е модерен римејк на „Ромео и Јулија“ и ја обработува забранетата љубов во свет на спротивставени танчарски банди. Филмот, што е втора долгометражна адаптација на истоимениот сценски мјузикл од 1957 година, е номиниран во дури седум категории: за најдобра фотографија на филм, најдобра споредна актерка (Аријана де Босе), дизајн на продукција, звук, дизајн на костум, кинематографија и, секако, во категоријата за најдобар режисер е Спилберг, кој со овој свеж римејк го остварува својот долгогодишен сон да режира мјузикл.
Инаку, церемонијата за доделувањето на 94. Оскари е најавена за 27 март 2022 година. Најнаградуван режисер досега е Џон Форд со четири освоени Оскари, потоа Френк Капра и Вилијам Вајлер кои имаат по три Оскари. Најноминираниот режисер е Вилијам Вајлер со 12 номинации, а најноминиран режисер што не освоил Оскар е Кларенс Браун, со шест номинации зад себе.
(Текстот е објавен во ТВ и Филмски печат на 18 март 2022 во весникот „Слободен печат“)