Тениски спектакл во Белград, Ѓоковиќ го најави доаѓањето и на Зверев
Претходно учеството на турнирите во организација на првиот тенисер на АТП ранг листата го потврдија и Доминик Тим, Григор Димитров и Марин Чилиќ.
Новак Ѓоковиќ е организатор на „Adria Tour“, а првиот од четирите турнири ќе се игра на 13. и 14. јуни во Белград. Останатите домаќини на „Adria Tour“ се Задар (20/21 јуни), Црна Гора (27/28 јуни) и Бања Лука (3/4 јули), покрај тоа на 5. јули, Ѓоковиќ во Сараево ќе одигра егзибициски дуел со Дамир Џумхур.
Покрај тоа, Ѓоковиќ најави дека на дел од турнирите ќе учествуваат и тенисери од топ 10 ранг листата, како Доминик Тим и Александер Зверев, а учеството го потврдија и Григор Димитров и Марин Чилиќ.
– Среќен сум што ќе можам да играм пред домашната публика во Белград но и во регионот. Турнирот е од хуманитарен карактер и сите приходи ќе бидат наменети за одредени организации. Некои од тенисерите ќе играат на сите турнири, а покрај Доминик Тим и Григор Димитров, учеството го потврди и Александар Зверев – изјави Ѓоковиќ кој додаде дека се надева оти ќе биде дозволено да присуствува и публиката доколку го овозможат тоа условите.
– Турнирите ќе бидат во Белград и Задар, а Црна Гора и БиХ сè уште не се 100% потврдени како сигурни локации но работиме и тоа да се случи. Тим ќе игра во Белград, Зверев во Белград и можеби во Задар, Димитров треба да игра во Белград и Црна Гора. Сакаме да организираме и неколку натпревари за нашите тенисерки.