Тен Хаг бесен на Роналдо: Тоа повеќе не смее да се повтори!
Манчестер јунајтед во неделата го одигра последниот контролен натпревар против Рајо Ваљекано на македонскиот репрезентативец Столе Димитриевски, а Кристијано Роналдо ја предводеше групата играчи кои го напуштија стадионот пред крајот на натпреварот.
Менаџерот на „црвените ѓаволи“, Ерик тен Хаг денеска изјави дека такво нешто е неприфатливо и не смее да се повтори.
– Не е само Роналдо, неколку играчи заминаа во текот на вториот дел. Секако дека такво нешто е неприфатливо. Ние сме тим, ние сме колектив. Секој играч мора да остане до крајот – рече Тен Хаг.
Ќе видиме како тоа ќе се одрази на Роналдо и на останатите играчи кои се во составот на холандскиот стратег. Но, едно е сигурно, ветровите сè уште дуваат од сите страни во Јунајтед и Тен Хаг има тешка работа пред него да воспостави контрола.
Првиот меч во новата премиерлигашка сезона Јунајтед ќе го има на 7 август на домашен терен против Брајтон.