Месото е богато со протеини и витамини, па токму тоа го прави неопходна храна за зачувување на нашето здравје. Но, како и за сѐ, така и со јадењето месо, никако не смее да се претера, бидејќи на тој начин може да се иницира сериозно влошување на целокупната здравствена состојба.

Сепак, добрата вест за сите љубители на месо е тоа што телото препознава кога сте претерале со внесот на овој вид храна. Кога ќе дојде до тоа, тоа ќе почне да ви сигнализира преку одредени влошувања на здравствената состојба. Вие треба да знаете како да ги препознаете и веднаш потоа да почнете со намален внес на овој вид храна за да може телото да се „исчисти“ од претераното консумирање месо.

Чувство на константен умор и поспаност

Иако протеините се неопходни за нормално работење на телото, сепак, доколку претерате со нивниот внес, можат да бидат причина за влошување на целокупната здравствена состојба. Ако внесувате многу месо во исхраната, со тоа внесувате и многу протеини што многу бавно се разградуваат. Сето тоа може да придонесе кон концентрирање на енергијата за да се свари храната. На тој начин, телото почнува да троши енергија, а како последица на тоа, чувството на умор и поспаност се неминовна појава.

Дехидрирање

Доколку многу често јадеме месо, нашето тело ќе почне да ги согорува наталожените резерви на масти, така што ќе почне да ги дели на помали делчиња. Токму зголеменото присуство на ваков тип масти во телото влијае врз зголемувањето на работата на бубрезите, кои трошат многу вода. Како последица на сите овие процеси во телото, може да дојде до дехидрирање. Затоа, доколку на вашето дневно мени многу често има месо, во тој случај обидете се барем да внесувате доволни количини течности.

Чувство на надуеност

Доколку забележите дека по секој оброк со месо имате болки во стомакот и чувство на надуеност, тоа треба да ви биде јасен знак дека телото не успева да го преработи како што треба. Воопшто чувството дека ви е лошо по јадење месо е јасен знак што треба да го препознаете и да се обидете, барем накратко, да го исфрлите месото од менито, со цел да видите дали ќе ви биде подобро без него.

Покрај тоа, во составот на месото, не се содржани растителни влакна (како што е случај со овошјето и со зеленчукот) и поради тоа варењето на храната се одвива многу бавно. Како последица на тоа може да дојде до појава на запек. Затоа и нутриционистите и лекарите константно апелираат месото да се јаде во комбинација со големи порции овошје и на зеленчук. Единствено на тој начин може да се спречи појавата на запек и комплетно да се елиминира чувството на надуеност во стомакот.