Тедрос е охрабрен: Четврта недела опаѓа бројот на заболени, втора недела во опаѓање и смртните случаи
Генералниот директор на Светската здравствена организација (СЗО), Тедрос Аданом Гебрејесус, денеска изјави дека падот на бројот на заболени со коронавирусот ширум светот е охрабрувачки, но предупреди дека не е време за олеснување на ограничувачките мерки.
Тој додаде дека бројот на пријавени случаи на инфекција на глобално ниво се намалува веќе четири недели, а бројот на смртни случаи е две недели во опаѓање.
– Се чини дека овој пад се должи на земјите кои ги засилуваат мерките за јавно здравје. Сето ова треба да нè охрабри, но задоволството е исто толку опасно како и самиот вирус, изјави Гебрејесус.
Тој додаде дека сега не е време ниту една земја да ги олесни мерките или која било индивидуа да се опушти.
– Секој живот што е зaгубен сега е уште потрагичен, затоа што почна вакцинацијата, нагласи шефот на СЗО.
Регистрирани се 108 милиони случаи на зараза со коронавирус во светот, 2,3 милиони луѓе починале како резултат на ковид-19.