На Собранието на Македонскиот театарски фестивал „Војдан Чернодрински“, одржано во Скопје, д-р Ана Стојаноска, театролог и професор на ФДУ, е избрана за нов претседател на Собранието на фестивалот.

Изборот на новиот претседател доаѓа откако Собранието на МТФ „Војдан Чернодрински“ констатирало дека е изминат мандатот на досегашниот претседател Катарина Коцевска Хаџи Василева.

– Му благодарам на Собранието на МТФ „Војдан Чернодрински“ што ме избра. Се надевам дека ќе имаме одлична соработка со сите театри. Главниот мој фокус ќе биде создавање на фестивал според современите стандарди, фокусиран на домашната драма и новиот театар. Со сериозен концепт и можност да се види каков театар создаваме денес, со програми што ќе го „оживеат“ театарскиот сјај и со грижа за театарското наследство – изјавила д-р Ана Стојаноска по нејзиниот избор.

(Текстот е објавен во „Културен печат“ број 147, во печатеното издание на весникот „Слободен печат“ на 24-25 септември 2022)