Театарска работилница: „Конфликт!“ со Иван Поповски
Мајсторска работилница за театарски актери и режисери со наслов „Конфликт!“, водена од Иван Поповски, од 2 до 5 декември се одржа преку платформата Зум. Работилницата е дел од програмата „Мајсторски работилници за актери и режисери 2“ организирана од „Театар на навигаторот Цветко“ и проект-просторот „Кино Култура“, а проектот е поддржан од Општина Центар, Град Скопје и Министерството за култура. Станува збор за ретка можност младите режисери и студенти да работат и учат заедно со Иван Поповски, македонски театарски режисер со руска „школа“, кој живее и работи во Москва повеќе од две децении.
Иван Поповски беше примен на театарска режија на Државниот институт за театарска уметност (ГИТИС) во 1988 година, а дипломираше во 1993 година, во класата на познатиот руски режисер Пјотр Наумович Фоменко. Подоцна Поповски стана еден од основачите на театарот „Мастерскаја П. Н. Фоменко“, каде постави повеќе претстави, а работел и во голем број театри во Русија, но и низ целиот свет, од Омск до Њујорк. Добитник е на најзначајните руски театарски награди.
Во Македонија Поповски досега ги има поставено претставите: „Macedoine: Одисеја 2001“ (2001), копродукција на Драмски театар, МНТ, Народен театар од Битола, фестивалите „Охридско лето“ и МОТ, со чија премиера на 12.07.2001 година беше отворен реставрираниот Антички театар во Охрид; „Дневникот на лудиот“ од Н.В. Гогољ (2001), независен проект на продукцијата на Бајруш Мјаку; и „Мајсторот и Маргарита“ од М. Булгаков (2015) во Македонски народен театар во Скопје.
(Текстот е објавен во „Културен печат“ број 59, во печатеното издание на „Слободен печат“ на 5-6 декември 2020)