Двајца косовски државјани, татко и син, се уапсени при обидот да прошверцуваат 9- годишно девојче од Косово преку Србија во Германија во автомобилскиот простор за резервна гума.

Српските цариници во саботата на граничниот премин Мердаре спречиле обид за криумчарење на деветгодишно девојче од Косово во Германија. Детето било најдено во просторот за резервна гума во Крајслер со германски таблички. Со него патувале 42- годишен татко и неговиот 17-годишен син на пат од Подујево кон Германија.

Таткото имал косовски пасош, а синот германска лична карта. Тие рекле дека немаат ништо за царинење, но во соработка со полицијата, цариниците го нашле девојчето, покрај коe имало и документи.

Возачот, откако било најдено девојчето, рекол дека тоа му е внука, која живее во Германија и дека случајно се сокрила во автомобилот.

Девојчето е предадено во центарот за социјална работа во Прокупље, а таткото и синот се задржани во 48-часовен притвор до судењето.