Таравари го почна новиот мандат во Гостивар, мнозинство во Советот имаат Алијанса и ВМРО-ДПМНЕ
Со врачувањето на уверенијата на избраниот градоначалник, членовите на Советот на општина Гостивар и одржувањето на конститутивната седница, денеска е означен почетокот со работата на новата локалната самоуправа.
На пригодна церемонија, Општинската изборна комисија на Гостивар претпладне ги врачи уверението за нов четиригодишен мандат на Арбен Таравари за градоначалник и уверенијата на членовите на општинскиот Совет според остварените резултатите од Локалните избори 2021.
По преземањето на уверенијата беше организирана и конститутивната седница на која беа верификувани мандатите на 29 членови од вкупно 31 член, кои ги потпишаа свечените изјави. По верификацијата на мандатите, беа формирани и две комисии во состав на Советот.
Според претходно постигнатиот договор, мнозинство во Советот имаат коалицијата Алијанса за Албанците-Алтернатива (10), ВМРО-ДПМНЕ (4), Демократска партија на Турците во Македонија (3), Демократски сојуз на Ромите (1) и Беса (1), кои ќе даваат поддршка на градоначалникот. Опозициски ќе делуваат ДУИ со девет и СДСМ со три советници.
Според дискусиите и најавата, претседателот на Советот и членовите на останатите комисии ќе бидат избрани на првата наредна седница.