Во болниците во Кочани, Штип, во Клиничкиот центар во Скопје како и во „8 Септември“ и во Градската болница, досега се хоспитализирани 118 луѓе, по трагедијата што ноќеска се случи во дискотеката во Кочани.

Како што предмалку изјави министерот за здравство Арбен Таравари, пациенти има на Клиниките за хирургија, на КАРИЛ, на клиниката за пластична хирургија, како и на Детска хирургија.

„Нема пациент кој не е сместен и не е хоспитализиран, сите наши капацитети се ставени во функција за да спасиме што повеќе животи. Не сакам да шпекулирам за бројот на критични пациенти“, изјави Таравари.

Тој информира дека засега има доволно резерви на крв, но кажа дека ако има потреба од крвни деривати, тој ќе информира.

„И од соседните држави добивме повици. Засега сме комплетно организирани и нема потреба од странска помош“, додаде тој.