Танц Фест Скопје 2021 објави повик за млади кореографи
Интернационалниот фестивал „Танц Фест Скопје“, во рамките на својата програма за 2021 година, отвори повик за учество на млади кореографи (до 35 години), чии претстави можат да бидат вклучени во годинашната програма на фестивалот. На тој начин „Танц Фест Скопје“ продолжува со својата заложба за создавање и промоција на современата танцова сцена кај нас, поддршка на млади автори и нивна афирмација во земјава и странство.
– Фестивалот, и покрај ситуацијата во која се наоѓаме со пандемијата, успеа минатата година да ја оствари својата програма во живо и да презентира петнаесетина кореографии на отворена сцена, со што даде свој придонес во одржување на изведувачките уметности во центарот на вниманието. Дирекцијата на фестивалот сака и годинава да даде свој придонес со одржување на фестивалската програма и презентација на странски компании и уметници, но и презентација на македонски креативци, со што ќе им помогне на младите креативни сили да се изразат и опстојат во овие специфични услови во кои се наоѓаме – потенцира Рисима Рисимкин, основач и уметнички директор на фестивалот.
Повикот за млади кореографи може да се најде на веб-страницата на фестивалот, а отворен е до 27 април 2021. Фестивалската програма е предвидено да се одржи од 1 до 6 јуни, на повеќе отворени сцени низ градот, а учеството на компании од странство е веќе потврдено. И годинава фестивалската програма, покрај изведбите во живо, ќе може да се проследи онлајн. Програмата на фестивалот е поддржана од Министерството за култура и Град Скопје.
(Текстот е објавен во „Културен печат“ број 77, во печатеното издание на „Слободен печат“ на 17-18 април 2021)