Талески: Одбраната е клучот за успех против Веспрем
Екипата на РК Вардар утре (18.45 ч.) ги продолжува настапите во Лигата на шампионите, „црвено-црните“ во СЦ „Јане Сандански“ го играат првиот осминафинален натпревар против унгарскиот Веспрем.
Вардарци во натпреварот влегуваат во убедливиот триумф на конкурентот за титулата во домашниот шампионат, Е. Пелистер, а рецептот за успех според зборовите на Филип Талески е играта во одбраната.
– Овој осминафинален дуел за нас е многу важен, а екипата на Веспрем ни е многу позната. Игравме со нив на стартот на сезоната на СЕХА-лигата и таму не одигравме сјајно, онака како што знае Вардар да игра. Сепак, тоа беше почеток на сезоната, многу нови играчи имаше во Вардар, нови бекови и мислам дека сега е поинаку. Осум-девет месеци работи заедно оваа екипа и мислам дека треба да му се реваншираме на Веспрем. Сепак, знаеме дека се многу цврсти, играат квалитетна одбрана, многу висока е нивната зона и ќе треба многу фокусирано и бргу да ги решаваме сите ситуации во напад што ќе ни се нудат. Ние треба да одговориме со иста таква одбрана, гранитна и мислам дека ако одиграме маестрална одбрана, како што знаеме, со неколку брзи голови, мислам дека тука треба да сме во мала предност – вели Талески.