Поранешнот светски шампион во тешка категорија Џорџ Форман почина изминатата вечер на 76-годишна возраст, потврди неговото семејство.

Форман ќе остане запаметен како еден од најголемите боксери на сите времиња, а од професионалниот спорт се повлече во 1997 година.

„Нашите срца се скршени. Џорџ беше голем проповедник, посветен сопруг, грижлив татко и горд дедо и прадедо. Живееше живот исполнет со верба, понизност и цел“, објави семејството.

Форман во својата кариера во рингот првиот шампионски појас го загуби во 1974 година кога беше поразен од Мухамед Али меѓутоа две децении подоцна успеа да се врати на врвот.

Како 45-годишник успеа да го победи Мајкл Мурер и така стана највозрасниот шампион во тешка категорија.

Вкупно во кариерата успеа да забележи 76 победи и имаше само пет порази. По завршувањето на кариерата Форман беше успешен и во бизнисот остварувајќи голема заработка со рекламирањето на електрични скари и само во 1999 година заработи 137 милиони долари.