Претседателот на Косово, Хашим Тачи се сретна со Ричард Гренел, специјалниот претставник на претседателот на САД, Доналд Трамп за дијалогот Косово-Србија.

Тачи на Фејсбук рече дека на средбата е разговарано за политичката и економската ситуација во земјата и во регионот, како и за повторно започнување на дијалогот помеѓу Косово и Србија.

– Еден работен состанок со специјалниот претставник на претседателот Трамп за дијалогот помеѓу Косово и Србија, амбасадорот Ричард Гренел. Ние разговаравме за политичката и економска ситуација во земјата и регионот, како и за повторно започнување на дијалогот помеѓу Косово и Србија, напиша Тачи.

Тој рече дека улогата на САД е незаменлива во процесите низ кои поминува Косово.

– Ние ќе продолжиме да бидеме верен партнер на САД во заживувањето на стратешките интереси во Западен Балкан, додаде Тачи.

Според него, лидерството на Доналд Трамп ќе биде пресудно за постигнувањето на финалниот договор со Србија.