Косовскиот претседател Хашим Тачи рече дека ќе поднесе оставка доколу Специјалниот суд за злостроства на ОВК го потврди обвинението, чиј нацрт е подготвен од страна на обвинителството на тој суд.

„Следните денови, ќе се консултирам со политичките лидери околу наредните чекори. Ве уверувам уште еднаш, нема да се соочам со правдата од оваа канцеларија. Доколу обвининието биде потврдено, веднаш ќе поднесам оставка. Нема да дозволам овие лажни обвиненија да го свртат вниманието од Косово и можноста да го заземе своето место во меѓународната заедница, како членка на ОН, НАТО и Европската Унија“, рече Тачи.

Говорот на некогашниот политички лидер на ОВК однапред им беше поделен на медиумите.

Тачи пред медиумите излезе со неколку дена задоцнување и по разговорот со албанскиот премиер Еди Рама, кој обвинението против лидерот на Демократската партија на Косово го нарече „дел од поширок план на напад врз Косово и Албанците“, пренесе РТС.

Специјалното обвинителство на судот за воени злосторства на ОВК го предаде на советот на овој трибунал предлог обвинението, со кое некогшаниот политички лидер на ОВК Хашим Тачи и шефот на неговата тајна полиција Кадри Весели се товарат за убиство на 100 лица, како и низа други дела.

Иако не се објавени детали од обвинението, уште од крајот на 2017 година беше јасно дека обвинителството на новиот суд со седиште во Хаг покрена истрага против политичкиот лидер на ОВК и командантот на тајната полиција, но без објавување на било какви детали од таа истрага.

Истрагата против Весели се водеше поради одговорноста која ја сноси како некогашен шеф на ШИК, разузнавачка служба на ОВК, а имињата на двајцата лидери на ОВК се појавија во контекст на можно подигнување на обвинение откако Тачи покрена сериозна политичка иницијатива насочена кон укинување на Специјалниот суд за злосторства на ОВК.