Тачи му го додели на Хоти мандатот за да формира нова влада на Косово

Фото: МИА

Според претседателскиот декрет, Хоти има рок од 15 дена да го поднесе до Собранието предлогот за составот на новата Влада.

Претседателот на Косово Хашим Тачи му го додели попладнево на потпретседателот на Демократскиот сојуз на Косово (ЛДК) Авдулах Хоти мандатот да ја формира новата влада, со оглед дека на актуелната, предводена од Албин Курти, на 25 март ѝ беше изгласана недоверба од Собранието на Косово, јави дописникот на МИА од Приштина.

Во соопштението од кабинетот на Тачи се наведува дека тој го потпиша декретот за именување на Хоти за мандатар и истиот го достави до Собранието на Косово.

Според претседателскиот декрет, Хоти има рок од 15 дена да го поднесе до Собранието предлогот за составот на новата Влада.

Тачи објави дека го доделил мандатот на кандидатот на ЛДК за премиер, откако таа партија соопшти дека го обезбедила потребното парламентарно мнозинство за изгласување на новата влада.

Претседателот на државата нагласи дека сите дејствија во правец на формирањето на новата влада ги презел согласно неговите уставни и законски надлежности и овластувања.

Мандатарот Хоти тврди дека ќе ја формира владата заедно со Алијансата за иднината на Косово (ААК) на Рамуш Харадинај и Социјалдемократската иницијатива (Нисма) на Фатмир Лимај, со кои вчера и денеска ЛДК потпиша договори за коалиција, како и со Српската листа (СЛ) и со партиите на другите немнозински етнички заедници. ЛДК и Хоти тврдат дека го обезбедиле потребното мнозинство во актуелниот собраниски состав за изгласување на новата Влада.

Партијата на вршителот на должноста премиер Албин Курти, Движењето самоопределување (ВВ), се противи на формирањето нова влада и тврди дека единствено уставно решение во ваква ситуација се вонредни парламентарни избори, кои би се одржале веднаш по надминувањето на кризата предизвикана од епидемијата на новиот коронавирус.

ВВ најави дека дејствијата на Тачи во правец на формирање на нова влада и нејзиното евентуално изгласување од страна на Собранието ќе ги оспори пред Уставниот суд на Косово. 

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот