Светска здравствена организација (СЗО) денеска објави дека има итна потреба од 10 милиони дози вакцини против ковид-19 за 20 земји да можат да почнат со имунизација и ја повика меѓународната заедница за донација.

– Меѓународниот систем за распределба на вакцини КОВАКС, со кој управува СЗО и другите партнери итно има потреба од 10 милиони дози за тие 20 држави да можат да почнат со имунизација на здравствените работници и повозрасните луѓе во следните две недели, изјави генералниот директор на СЗО, Тедрос Аданом Гебрејесус.

Тој додаде дека 10 милиони дози вакцини не се многу и оти се далеку од доволни, како и дека во иднина ќе бидат потребни уште стотина милиони дози.

Според Гебрејесус досега 117 држави почнаа со вакинација, а благодарение на КОВАКС распределени се над 32 милиони дози во 61 држава.

Тој истакна дека КОВАКС е подготвен да испорача вакцини, но оти не може да испорача затоа што нема.

– Како што знаете билатералните договори, забраната за извоз, вакциналниот национализам и вакциналната дипломатија предизвикаа нарушување на пазарот, со флагрантна нееднаквост помеѓу понудата и побарувачката, посочи Гебрејесус.

Преку КОВАКС планирано е да се испорачаат вакцини за 20 проценти од светското население во речиси 200 држави и територии, вклучително и механизмот за финансирање и помош за 92 сиромашни земји.